दुबईमा कार धुने नेपाली युवकले जिते ३४ करोडको चिठ्ठा, रातारात खुल्यो भाग्य !

रामेछाप खबर संवाददाता

६ असोज, काठमाडौं ।

नेपालका एक युवकले दुबईमा झण्डै ३५ करोड रुपैयाँ बराबरको चिठ्ठा जितेका छन् । दुबईमा कार सफा गर्ने काम गर्दै आएका ३१ वर्षीय भरत बिश्वकर्माले त्यहाँको चर्चित मजुज चिठ्ठा जितेका हुन् ।

केही वर्षदेखि मासिक नेपाली ४५ हजारमा कार सफा गर्ने काम गर्दै आएका उनले ९एक करोड दिराम० झण्डै ३५ करोड नेपाली रूपैयाँ बराबरको चिठ्ठा जितेका हुन् । नेपालको गुल्मीका रहेका भरतले लामो समयदेखि सोही चिठ्ठा किनिरहेका थिए । तर एक्कासी उनको भाग्य खुल्यो र झण्डै ३५ करोड नेपाली रूपैयाँ बराबरको चिठ्ठा जिते । टिभीमा लाइभ हेरिरहेका उनले एक्कासी थाहाँ पाउँदा खुसीले गदगद भए । उनले भने ‘शनिवार राति टिभीमा लाइभ हेरिरहेको थिएँ, मैले स्क्रिनमा आफ्नै चिठ्ठा नम्बर देखेँ, त्यसपछि खुसीले सुत्नै सकिनँ ।’

चिठ्ठा जित्नुअघिसम्म उनको दुबईमा बैंक खाता समेत नभएको बताइएको छ । उनले आफूले जितेको यो पैसाले आफ्नो ऋण तिर्ने र ब्रेन ट्युमरपछि प्यारालाइसिस भएका आफ्ना भाइको अपरेशनका लागि खर्च गर्ने बताए ।

थप समाचार :मनाङको शैक्षिक अवस्था : शिक्षक छन्, विद्यार्थी छैनन्
हिमाली जिल्ला मनाङका अधिकांश विद्यालय बाल विकास कक्षाका भरमा मात्र अडिएका छन् । विद्यालय भए पनि विद्यार्थी न्यून छन् । अभिभावकले बालबालिकालाई अन्यत्र सार्ने गरेका कारण बाल विकास कक्षाबाहेकका विद्यार्थी न्यून भएका हुन्् ।

शिक्षा विकास तथा समन्वय एकाइका अनुसार जिल्लाका २८ मध्ये १४ विद्यालयमा बाल विकास कक्षा मात्रै सञ्चालनमा छन् । नासों गाउँपालिकामा आठ, मनाङ ङिस्याङ गाउँपालिकामा दुई, चामे गाउँपालिकामा दुई र नार्पाभूमि गाउँपालिकामा दुई विद्यालयमा बाल विकास कक्षामा मात्रै विद्यार्थी रहेको शिक्षा विकास तथा समन्वय एकाईका प्रमुख मतिलाल चपाईले जानकारी दिनुभयो । “भवन र शिक्षक भएका ती विद्यालयमा बालविकास कक्षाको पढाए सकिना साथ विद्यालय रित्तिने गरेका छन्”, उहाँले भन्नुभयो ।

मनाङमा बाढी पहिराको जोखिम र विद्यालय टाढा भएकाले विद्यार्थी घटेको हुनसक्ने अनुमान गरिएको छ । जोखिम अवस्थामा रहेका विद्यालयको अवस्थाले पनि विद्यार्थी अन्यत्र सरेको उहाँको भनाइ छ । शैक्षिक सुधारका विभिन्न कार्यक्रमलाई प्रभावकारीरुपमा कार्यान्वयन गरिए पनि विद्यार्थी भने न्यून रहेको चपाईले बताउनुभयो । विद्यार्थी शून्य हुँदै जानुका विषयमा स्थानीय सरकारसमक्ष विभिन्न तवरबाट छलफल भइरहेको उहाँले बताउनुभयो ।

जिल्लाका चार पालिकाका विभिन्न विद्यालय विद्यार्थीविहीन भएका छन् । “विद्यालय भवन र शिक्षक छन् । विद्यार्थी छैनन् । यस्तो अवस्थामा विद्यालय बन्द गर्नुबाहेक कुनै विकल्प छैन”, चपाईले भन्नुभयो, “केही विद्यालयमा इसिडीका विद्यार्थी छन् ।” बाढीपहिराको जोखिम, विद्यालय टाढा हुँदा अभिभावकले बालबालिकालाई जिल्ला बाहिर आफन्तकोमा वा छात्रावासमा राखी पठनपाठन गराइरहेको अनुसन्धानका क्रममा पाइएको उहाँले बताउनुभयो ।

जोखिमरहित तवरबाट बालबालिकालाई पठनपाठनको व्यवस्था भएमा आफूसँगै राखेर पढाउने अभिभावकको भनाइ छ । बाल विकासदेखि कक्षा १२ सम्म कूल पाँच सय ४५ विद्यार्थी तथा एक सय ६१ शिक्षक रहेको शिक्षा विकास तथा समन्वय एकाइ मनाङले जनाएको छ ।