साउदीमा अलपत्र १६ नेपाली भोकभोकै सडकमा

रामेछाप खबर संवाददाता

३१ साउन, काठमाडौं ।

आकर्षक रोजगारीको प्रलोभनमा साउदी अरब पुगेका १६ जना नेपाली कम्पनीले कोठाबाट निकालेपछि भोक भोकै सडकमै दिनरात बिताउन बाध्य भएका छन् । उनीहरू करिब ९ महिनाअघि त्यहाँ पुगेका थिए । काठमाडौँको गौरीघाटमा रहेको यात्रा एचआर सोलुशन प्रालिलाई प्रतिव्यक्ति १ लाख ७० हजारदेखि २ लाखसम्म बुझाएर साउदी अरबमा रहेको युनियन कनट्र्याक्ट नामको कम्पनीमा पठाएको र म्यानपावरले सम्झौता गरे अनुसारको काम र तलब नपाएपछि अलपत्र परेको पीडितहरूले बताए ।

पछिल्लो समय कम्पनीले बसिरहेको क्याम्पबाट रातारात निकालिदिएपछि अहिले भोक भोकै सडकमै रात बिताइरहेको अलपत्र मध्येका सुरजकुमार सदाले सुनाए । ‘म्यानपावरले सम्झौता गरे बमोजिम काम र तलब नपाएपछि हामी विगत ९ महिनादेखि अलपत्र अवस्थामा छौ ,’ अर्का पीडित मोहन कुमार चौधरीले भने, ‘सुरुको दुई/तीन महिना काम पनि गरेका थियौ, त्यसपछि हामीले काम पाएका छैनौ म्यानपावर कम्पनी आज हुन्छ, भोलि हुन्छ भनेर झुक्क्याउने काम मात्र गरेको छ ।’

आफूहरूको समस्या लिएर रियादस्थित नेपाली दूतावासको शरणमा पुग्दा पनि कुनै सुनवाइ नभएको पीडितहरूले बताएका छन् । ८० जनाको ग्रुपमध्ये ६४ जनालाई म्यानपावरले उद्धार गरी नेपाल फर्काएको तर आफूहरूलाई सौतेनी आमाको जस्तो व्यवहार भएको उनीहरू बताउँछन्। चाँडो उद्धारको माग गर्दा म्यानपावरले अझै ६ महिना साउदीमै राख्छु भन्ने धम्की दिएको पीडितहरूको भनाइ छ ।

उनीहरूलाई साउदी प्रहरीले भेटेर समस्याबारे जानकारी लिएको र कम्पनीको मालिकलाई सम्पर्क गरी बस्ने व्यवस्था मिलाउन भनेको छ तर कम्पनी प्रशासनले कुनै चासो नदिएको उनीहरूले बताए ।

लामो समयदेखि कामविहीन भएर बस्नुपर्दा खानाको लागिसमेत पैसा नभएकोले भोकै बस्नु परेको उनीहरूले दुखेसो पोखे । आफूहरूलाई सकुशल उद्धार गरी स्वदेश फर्कने वातावरण मिलाइदिन र म्यानपावरका सञ्चालकलाई कारबाही गरी क्षतिपूर्ति दिलाइदिन उनीहरूले नेपाल सरकार, श्रम मन्त्रालय, वैदेशिक रोजगार विभाग, नेपाली दूतावास लगायत सम्बन्धित निकायलाई आग्रह गरेका छन् ।

उद्धारका लागि विभिन्न निकायहरूलाई अनुरोध गरिरहेको भए पनि अहिलेसम्म कतैबाट पहल भएको छैन । साउदीमै रहेका एजेन्ट वीरेन्द्र राई पनि समस्या समाधान गर्नुको सट्टा तिमीहरूले जे गर्छौ गर भनेर धम्की दिने गरेको उनीहरूले बताए । म्यानपावरका सञ्चालक भनिएका दिनेश केसीलाई खबरहबले सम्पर्क गर्दा बोल्नै चाहेनन् ।

यी हुन् साउदीमा अलपत्र १६ नेपाली युवाहरु :
ललन कुमार पासवान,अनुर कुमार झोलन,राजेश राय यादव,सुरज कुमार सदा,बिर्जु राउत कुर्मी,राम प्रसाद राउत,शिव प्रसाद राउत कुर्मी,सुजव महतो
मोहन कुमार चौधरी,चन्द्र शेखर शाह तेली,राजु झोलन,मो हिरा नदाक,जाहिन्द्रा रायन,असरफ कवारी,असलम नदाक,गणेश चौधरी
खबरहब