साउदीमा नेपालीले नेपाली नै ठग्ने क्रम बढेको भन्दै दुतावासले जारी गर्यो यस्तो सुचना !

रामेछाप खबर संवाददाता

१७ असार, काठमाडौं ।

साउदीमा नेपालीले नेपाली नै ठग्ने क्रम बढेको भन्दै रियादस्थित नेपाली दूतावासले सचेत हुन आग्रह गरेको छ । दूतावासले एक सूचना जारी गर्दै एक्जिट भिसा मिलाइ दिने र सेटिङ गरेर नेपाल पठाइदिने भनेर कसैले भनेमा साउदी प्रहरीलाई खबर गर्न आग्रह गरेको हो । एक्जिट भिसा प्रोसेसिङ निःशुल्क हुने, यस बापत एक हलाला पनि कहीँ कतै बुझाउनु नपर्ने, दूतावासमा आफूले चिनेका मान्छे भएको र यति पैसा लाग्छ भन्ने व्यक्तिको विश्वास नगर्न दूतावासले आग्रह गरेको छ ।

त्यसैगरी, कुनै दलालले सेटिङ गरेर नेपाल पठाइदिने लगायतका कुराहरु गरेमा उक्त व्यक्तिको बारेमा साउदी प्रहरीको ९११ नम्बरमा तुरुन्तै खबर गर्न समेत दूतावासले अनुरोध गरेको छ । दूतावास रियाद र महावाणिज्यदूतावासले मात्र एक्जिट भिसा प्रोसेसिङ गर्ने, एक्जिट भिसा प्रोसेसिङ पूर्ण निःशुल्क भएको तर एक्जिट भिसा आइसकेपछि नेपाल फर्किने हवाई टिकट व्यक्ति स्वयंले व्यवस्था गर्नुपर्ने दूतावासले जनाएको छ ।

इकामाको म्याद सकिएको ३ महिना भन्दा बढी भैसकेको, साउदी आएको ३ महिनाभन्दा बढी समयसम्म कम्पनीले इकामा बनाइदिएको छैन वा कम्पनीले हुरूब लगाइदिएको छ भने मात्रै राजदूतावास वा महावाणिज्यदूतावासबाट एक्जिट भिसा प्रोसेस गर्न मिल्ने दूतावासले जनाएको छ । साथै इकामाको म्याद भएकाहरूको एक्जिट भिसा प्रोसेसिङ दूतावासबाट गर्न नमिल्ने जनाइएको छ ।

जुन ठाउँबाट आफ्नो इकाममा बनेको हो त्यही ठाउँको श्रम कार्यालय र अध्यागमन कार्यालयमा मात्र एक्जिट भिसाको लागि प्रोसेसिङ गर्नुपर्ने साउदी नियम रहेको छ । तसर्थ, एक्जिट भिसा प्रोसेसिङको लागि दूतावासमा आउनुभन्दा पहिले आफ्नो इकामा कहाँबाट बनेको हो अनिवार्य रूपमा एकिन गर्न दूतावासले अनुरोध गरेको छ ।

रियादबाट इकामा बनेकाहरू मात्रै एक्जिट भिसा प्रोसेसिङको काम दूतावासबाट हुनेछ । रियाद भन्दा बाहिरबाट इकामा बनेकाहरूले एक्जिट भिसा प्रोसेसिङका बारेमा फोनबाटै जानकारी लिन सक्ने दूतावासले जनाएको छ। एक्जिट भिसा प्रोसेसिङका लागि मोवाइल नम्बर ०५०००२१४०९ वा ०५४७०४५२७२ मा सम्पर्क गर्न सकिनेछ ।