जजीरा एअरवेजले कतार र साउदीबाट पनि गौतम बुद्ध विमानस्थलमा उडान भर्ने

रामेछाप खबर संवाददाता

काठमाडौं ।

जजीरा एअरवेजले कतार र साउदी अरबबाट गौतम बुद्ध अन्तर्राष्ट्रिय विमानस्थलमा साताको तीन वटा उडान भर्ने भएको छ । बुद्ध जयन्तीको शुभ-अवसर पारेर जेठ २ गते सोमबार औपचारिक उद्घाटन हुने नेपालको दोस्रो अन्तर्राष्ट्रिय विमानस्थल भैरहवामा जजीरा एअरवेज उडान भर्न लागेको दोहास्थित नेपाली दूतावासले जनाएको छ।

दूतावासका अनुसार पहिलो उडान सोही दिन तथा आगामी १२ जुन २०२२ देखि दोहाबाटसमेत साताको तीन वटा नियमित उडान सुरु गर्ने तालिका सार्वजनिक गरेको जनाएको छ । दोहा-कुवेत र कुवेत-भैरहवा उडान गर्नेछ । टिकट लगायत अन्य विस्तृत जानकारीका लागि उक्त एयरलाइन्सको कतारस्थित कार्यालयमा ४४२७१०१०/३०७०१०४२ सम्पर्क गर्न सकिने दूतावासले जनाएको छ ।

यस्तै साउदी अरबबाट पनि जजिरा एयरवेजले नियमित उडान सञ्चालन गर्ने भएको छ । एयरवेजले साउदी अरबको रियाद, दमाम, जेद्दा र मदिना सहरबाट गौतमबुद्ध अन्तर्राष्ट्रिय विमानस्थल, भैरहवामा आगामी मे १५ तारिखदेखि उडान गर्ने रियादस्थित नेपाली दूतावासले जनाएको छ ।

यो पनि..साउदीमा अप्ठेरोमा परेकालाई दूतावासले एक्जिट भिसा प्रोसेसिङ गर्ने
साउदीबाट विभिन्न कारणले नेपाल फर्किन नपाएकाहरूका लागि रियादस्थित नेपाली दूतावासले एक्जिट भिसा प्रोसेसिङ गर्ने भएको छ । कम्पनीले इकामा नबनाइदिएको वा इकामा नवीकरण नगरिदिएको वा हुरूब लगाइदिएको कारणले नेपाल फर्किन नपाएकाहरूको एक्जिट भिसा प्रोसेसिङ गरिने दूतावासले जनाएको छ ।

दूतावासका अनुसार कम्पनीले सम्झौता अनुसारको तलब सुविधा दिएको छैन, काम गरेको समयको तलब दिएको छैन, ओभरटाइमको पैसा दिएको छैन, छुट्टीमा घर जान दिएको छैन, अलपत्र पारेको छ, अनावश्यक जरिवाना लगाइदिएको छ, फर्जी कागज बनाएर फसाएको छ भने समाधानको लागि पहल गरिनेछ ।

यस्तो समस्या भएका कामदारले आफ्नो राहदानी र इकामाको फोटोकपी, आफ्नो सुपरभाइजर वा कम्पनीको एचआर वा कफिलको सम्पर्क मोबाइल नम्बर लिएर आउन भनेको छ । इकामा छैन भने साउदी आउँदा अध्यागमनले राहदानीको जुन पेजमा बोर्डर नं. लेखिदिएको दिएको छ त्यो पेजको फोटोकपी लिएर आउन दूतावासले भनेको छ ।

दूतावासले आगामी मे २० तारिखका दिन साउदीको पूर्वी क्षेत्रमा पर्ने दम्माममा समस्यामा परेका नेपाली श्रमिकहरुलाई मध्यनजर गर्दै ‘श्रमिक सचेतना कार्यक्रम कार्यक्रम’मार्फत श्रमिकहरुको समस्या तथा गुनासो संकलन गरी समस्या समाधान गर्न लागेको हो ।

पछिल्लो समयमा साउदीमा हुरूब लगाइदिएको कारणले नेपाल फर्किन नसकेका, कम्पनीले हुरुब लगाई दिएर जबरजस्ती जेल हालेका र नेपालबाट सम्झौता गरिएअनुसारको काम र तलब नपाएको भन्दै सयौँ नेपाली अलपत्र अवस्थामा भोकभोकै सडकमै रात बिताइरहेका छन् ।

दूतावासले गर्न लागेको यस कार्यक्रमबाट त्यहाँ अलपत्र नेपालीहरूलाई स्वदेश फर्किन सहयोग पुग्ने अपेक्षा गरेको छ । यसअघि पनि दूतावासले एक सूचना जारी गरी पछिल्ला दिनहरूमा साउदी अरबमा रोजगारीमा आएका उल्लेख्य संख्याका नेपालीहरुले म्यानपावर र एजेन्टले भने अनुसारको काम र तलब नपाएको गुनासो आइरहेका जनाएको थियो ।