श्रमिकको तलब १५ सय रिंगेट बढाउने मलेसियाली प्रधानमन्त्रीको घोषणा !

रामेछाप खबर संवाददाता

मलेसिया ।

मलेसिया सरकारले आप्रवासी कामदार लगायत सम्पूर्ण निजी क्षेत्रमा काम गर्ने कामदारहरुको न्यूनतम पारिश्रमिक वृद्धि गर्ने घोषणा गरेको छ । मलेसियाका प्रधानमन्त्री दातुक सेरी इस्माइल साबरी याकोबले आगामी १ मेदेखि श्रमिकको न्यूनतम पारिश्रमिक १५ सय रिंगेट बनाउने घोषणा गरेका छन् ।

मलेसियामा न्युनतम तलब बढेसँगै मलेसियामा कार्यरत नेपाली श्रमिकहरु लगायत आप्रवासी कामदारहरुलाई पनि फाइदा पुग्ने भएको छ ।

हाल मलेसियामा विभिन्न क्षेत्रमा गरी करिब चार लाखको हाराहारीमा नेपालीहरू कार्यरत छन् । पारिश्रमिक वृद्धि गर्ने घोषणा गरेपनि कार्यनयन हुनेमा अधिकांश कामदारहरुमा शंका भने रहेको छ । यसअघि पनि सन् २०२० मा मलेसियामा नीजी क्षेत्रका कामदारहरुको न्यूनतम तलब १२ सय रिंगेट उपलब्ध गराउने सरकारले निर्णय गरेपनि अधिकांश कम्पनीहरुले यसलाई कार्यान्वयन गर्न बर्सौं लगाएका थिए ।

यसरी सरकारले तोकेबमोजिम न्युनतम पारिश्रमिक उपलब्ध नगराउनेहरुमा सेक्युरेटी कम्पनीहरु रहेको सेक्युरेटी क्षेत्रमा कार्यरत नेपाली श्रमिक हरुको गुनासो रहेकोे थियो ।

हाल मलेसियामा न्यूनतम पारिश्रमिक १२ सय रिंगेट छ । यो व्यवस्था १ फेब्रुअरी, २०२० मा तय गरिएको थियो । मलेसिया सरकारले न्यूनतम पारिश्रमिक १ हजार ५ सय रिंगेट बनाउने घोषणासँगै त्यहाँ कार्यरत लाखौँ नेपाली श्रमिक पनि लाभान्वित हुने भएका छन् ।

यो पनि…तेस्रो अन्तर्राष्ट्रिय उद्यमशीलता सम्मेलन हुने

क्लक बी बिजनेस इनोभेसन्स र काठमाडौंस्थित भारतीय दूतावासको सहयोगमा बुधबार राजधानीमा तेस्रो अन्तर्राष्ट्रिय उद्यमशीलता सम्मेलन हुने भएको छ । उक्त सम्मेलनमा नेपाल भारतका उद्यमशीलतामा नव प्रवेशी व्यवसायी, उद्यमीहरू, महत्वाकांक्षी युवाहरू, विज्ञहरू, नेपाल भारतका उच्च सरकारी अधिकारीहरूको समेत सहभागिता रहने भएको छ ।

३ सयभन्दा बढी युवा व्यवसायीहरूको सहभागिता रहने सम्मेलनमा नेपाल भारतका १५ भन्दा बढी वक्ताहरूले उद्यमशीलताका बारेमा आ–आफ्नो विचार राख्ने आयोजक संस्थाका प्रतिनिधि विनय देवकोटाले जानकारी दिनुभयो ।

यस सम्मेलनअन्तर्गत चैत १ गते भएको आइडिया अडिसनबाट आफ्ना स्टार्ट अप व्यवसायलाई प्रस्तुत गरेका २० स्टार्ट अप व्यवसायमध्ये प्रतिस्पर्धाको आधारमा उत्कृष्ट ४ उद्यमी छनौट भएका थिए । छनौट भएका उत्कृष्ट ४उद्यमीहरूमा टेक्का, बोया फ्रेस, सारंग र वेद रहेका छन् ।

छनौट भएका उत्कृष्ट ४उद्यमीहरूले नेपाल र भारतका प्रख्यात उद्यमीहरूका सामु बुधबार आयोजना हुने फिनालेमा आफ्नो व्यावसायिक विचार लगानीका लागि प्रस्तुत गर्ने अवसर पाउने क्लक बीका बिजनेस डाइरेक्टर दिलराज जोशीले जानकारी दिनुभयो ।

सम्मेलन, दुई देशका युवा उद्यमीलाई उद्यमशीलता सम्मेलनमा आपसी छलफल, नयाँ– नयाँ आवधराणा विकास तथा विस्तार र अवसर खोजी गर्ने साझा प्लेटफर्म हुने भारतीय दूतावासका प्रथम सचिव अभिषेक उपाध्यायले जानकारी दिनुभयो ।