माघ १५ गतेसम्म विद्यालय बन्द गर्ने निर्णय

रामेछाप खबर संवाददाता

२६ पुस, काठमाडौं ।

शिक्षा मन्त्रालयले माघ १५ गतेसम्म विद्यालय बन्द गर्ने निर्णय गरेको छ । सोमबार मन्त्रालयमा बसेको सचिवस्तरीय बैठकले कोभिड–१९ संकट व्यवस्थापन समन्वय केन्द्र (सीसीएमसीसी) को सिफारिसलाई कार्यान्वयनमा लैजाने निर्णय गरेको हो ।

आइतबार सीसीएमसीसीले वार्षिक बिदामा मिलान हुने गरी माघ १५ सम्म विद्यालय बन्द गर्न शिक्षा मन्त्रालयसमक्ष सिफारिस गरेको थियो । बिदाकै अवधिमा १२ देखि १७ वर्षसम्मका विद्यार्थी र १८ वर्षभन्दा माथिका सबै उमेर समूह र पूर्ण खोप लगाउन बाँकी शिक्षक, कर्मचारी तथा अभिभावकलाई खोप उपलब्ध गराउन पनि सिफारिस गरिएको छ । विद्यालय बन्दको मोडालिटीसहितको पूर्ण जानकारीसहितको सूचना मन्त्रालयले जारी गर्ने तयारी गरेको छ ।

विश्वविद्यालय र शैक्षिक प्रतिष्ठानका पूर्वनिर्धारित सेमेस्टर र वार्षिक परीक्षा जनस्वास्थ्य र सुरक्षाका मापदण्ड पालना हुने गरी सञ्चालन, परीक्षा केन्द्रमा मास्क र सेनिटाइजरको प्रयोग र भौतिक दूरीको प्रावधान कडाइका साथ परिपालना गराउने व्यवस्था मिलाउन शिक्षा मन्त्रालयसमक्ष सिफारिस गरिएको थियो ।

नेविसंघमा अधिवेशनको माग, बेवास्ता भए देशभर दबाबमूलक कार्यक्रम

नेपाली कांग्रेसको भातृ संस्था नेपाल विद्यार्थी संघको अधिवेशन माग गर्दै दबाबमूलक गतिविधि सुरु भएको छ । महाधिवेशनको माग गर्दै दबाबमूलक गतिविधि अभियान सञ्चालन गर्ने निष्कर्षमा विद्यार्थी नेताहरू पुगेका हुन् । उनीहरूले अभियान सञ्चालन गर्न समिति बनाएका छन् । समितिमार्फत एक सातादेखि दबाबमूलक गतिविधिको तयारी भइरहेको संयोजक तथा विद्यार्थी नेता ताराबहादुर थापाले जानकारी दिए ।

दबाबका कार्यक्रम तय गर्न उनीहरूले निरन्तर छलफल अघि बढाइरहेका छन् । संयोजक थापाका अनुसार पार्टी समक्ष अधिवेशनको माग गर्दै ज्ञापन पत्र बुझाइने तयारी भएको छ ।

“अब तत्काल पार्टी नेतृत्व समक्ष ज्ञापन पत्रमार्फत ध्यानाकर्षण गराउने हामी तयारीमा छौँ,” उनले भने, “पार्टीले सम्बोधन नगरे दबाबका लागि गतिविधि देशव्यापी रूपमा अघि बढाउँछौं ।”