प्रचण्डलाई कोरोना पुष्टि भएपछि देउवा आइसोलेसनमा

रामेछाप खबर संवाददाता

२४ पुस, काठमाडौं ।

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लाई कोरोना भाइरसको संक्रमण पुष्टि भएपछि प्रधानमन्त्री शेरबहादुर देउवा एक साताका लागि सेल्फ आइसोलेसनमा बसेका छन् । कोरोना संक्रमणलाई मध्यनजर गर्दै देउवाले अत्यावश्यकबाहेकका भेटघाट एक सातालाई बन्द गरेका हुन् ।

त्यस्तै, प्रधानमन्त्री देउवाको आरटी-पीसीआर परीक्षण पनि हुने भएको छ । उनको आइतबार कोरोना परीक्षण हुने भएको हो । दुई दिनअघि बालुवाटारमा बसेको सत्ता गठबन्धनको उच्चस्तरीय राजनीतिक संयन्त्रको बैठकमा प्रचण्ड, देउवालगायत उपस्थित थिए ।

त्यसपछि प्रचण्डलगायत नेकपा माओवादी केन्द्रका १० नेताहरूको कोरोना रिपोर्ट पोजिटिभ आएको थियो । नेताहरूलाई कोरोना देखिएपछि बैठकसमेत स्थगित गरिएको छ । यता, आजै देउवाले प्रमुख प्रतिपक्षी दलका नेता नेकपा (एमाले) अध्यक्ष केपी ओलीसँग पनि भेट गरेका थिए ।

सहमतिको सम्भावना न्यून, अध्यक्षमा देउजा र थापा

नेकपा (एमाले) भक्तपुर जिल्ला कमिटीको शुक्रबारदेखि सुरु भएको आठौँ जिल्ला अधिवेशनमा आज निर्वाचन हुने भएको छ । जिल्लामा रहेको केन्द्रीय तहका नेताले सर्वसम्मत नेतृत्व चयन गर्ने प्रयास हिजोदेखि नै सुरु गरे पनि सहमति बन्ने सम्भावना न्यून भएकाले निर्वाचन हुने भएको हो । बन्दसत्रका अध्यक्ष एवं एमाले पोलिटब्युरो सदस्य महेश बस्नेतले आज बिहानदेखि नै प्रतिवेदन माथि समूहगतरुपमा छलफल भइरहेको र नेतृत्वमा सहमतिको प्रयास पनि भइरहेको जानकारी दिनुभयो ।

उहाँले भन्नुभयो, “अधिवेशनमा नेतृत्वका लागि एकभन्दा बढीको चाहना हुनु स्वभाविक हो, दुई जनाले अध्यक्षमा चाहना गर्नुभएको छ, हामी दिउँसो ३ बजेसम्म सर्वसम्मतकोे प्रयास गर्छौं, नभए ३ बजेपछि निर्वाचनको प्रक्रिया सुरु गर्छौं, आजै निर्वाचन सक्छौँ ।” जिल्ला अध्यक्षका लागि अहिलेका अध्यक्ष वचन देउजा र वाग्मती प्रदेशसभा सदस्य शशिजङ्ग थापाले उम्मेदवारी दिनुहुने भएकोे छ ।

एकसय पाँच सदस्यीय कमिटीमा सर्वसम्मत हुन नसकेका पदमा चुनाव गर्ने तयारी निर्वाचन समितिले गरे पनि एमाले केन्द्रीय नेता महेश बस्नेत, सोमप्रसाद मिश्रलगायत भने सर्वसहमतिको प्रयासबाटै नेतृत्व चयन गर्ने कसरतमा लाग्नुभएको बताइएको छ ।