म पहिलो चरणमै विजयी नभए दास्रो चरणमा सबै मिलेर देउवालाई पराजित गर्नेछौँ : नेता सिंह

रामेछाप खबर संवाददाता

२७ मंसिर, काठमाडौं ।

नेपाली कांग्रेसको १४ औँ महाधिवेशन अन्तर्गत सभापतिका उम्मेदवार प्रकाशमान सिंहले आफू पहिलो चरणमै विजयी हुने दाबी गरेका छन् । नेता सिंहले आफू पहिलो चरणमा विजयी नभए दास्रो चरणमा सबै मिलेर शेरबहादुर देउवालाई हराउने बताए ।

उनले भने, ‘ पहिलो चरणमै म विजयी हुन्छु । यदि पहिलो चरणमा नतिजा निस्केन भने दास्रो चरणमा हामी सबै मिलेर देउवालाई हराउ छौँ ।’ कांग्रेसको जारी महाधिवेशनमा पाँच जना सभापति पदका लागि उम्मेदवार छन् । यता सभापतिकै दावेदार विमलेन्द्र निधिले पनि चुनाव दोस्रो चरणमा गएपछि आफूहरु मिलेर देउवालाई पराजित गर्ने दावी गरेका छन् ।

भोट हालेर निस्केका देउवा पुनः मतदान स्थलमा

नेपाली कांग्रेसको जारी १४औं महाधिवेशनमा सभापतिका उम्मेदवार शेरबहादुर देउवा पुन: मतदान स्थलमा पुगेका छन्। यसअघि उनी मतदान गरेर भृकुटीमण्डपस्थित मतदान स्थलबाट बाहिरिएका थिए। देउवा मतदातालाई नमस्कार गर्दै पुन: मतदान स्थलमा आएका हुन्। उनी अहिले मतदान केन्द्रबाहिर कुर्सीमा बसेर आराम गरिरहेका छन्।

बिहान ८ बजेदेखि नै मतदान गर्ने भनिएपनि मतपत्र छपाइमा भएको ढिलाइले दिउँसो १२ बजेदेखि मात्र मतदान सुरु भएको थियो। निर्वाचन समितिका सदस्य तेजबहादुर रावलका अनुसार चार हजार ७४३ प्रतिनिधि (मतदाता) मध्ये दिउँसो करिब साढे २ बजेसम्म ६०० जनाले मतदान गरिसकेका छन्। कांग्रेसको भावी नेतृत्वका लागि वर्तमान सभापति देउवासँगै नेताहरू शेखर कोइराला, प्रकाशमान सिंह, विमलेन्द्र निधि तथा कल्याण गुरुङले उम्मेदवारी दिएका छन्।

यस्तै, महामन्त्रीका लागि गगन थापा, विश्वप्रकाश शर्मा, प्रकाशशरण महत, प्रदीप पौडेल, मिनेन्द्र रिजाल र राजाराम कार्कीले उम्मेदवारी दिएका छन्।