खोप नलगाएकालाई सार्वजनिक यातायातमा प्रतिबन्ध

रामेछाप खबर संवाददाता

२२ मंसिर, काठमाडौं ।

हरारे : जिम्बाबेमा कोरोनाभाइरसविरुद्धको खोप नलगाएका नागरिकलाई सार्वजनिक यातायातमा प्रतिबन्ध लगाइएको छ । कोरोना भाइरसको नयाँ भेरियन्टको रुपमा देखिएको ओमिक्रोनको सङ्क्रमण थप फैलिन थालेपछि उच्च सतर्कता अपनाउने सिलसिलामा यस्तो नियम लागू गरिएको हो । सरकारले कोरोनाको महामारी थप फैलिन नदिनका लागि थप चासो देखाएको छ ।

“पछिल्लो समयमा कोरोनाभाइरसबाट सङ्क्रमित हुनेहरूको सङ्ख्यामा वृद्धि भएको छ, त्यसैले मन्त्रीपरिषद्ले कडाइ गर्ने निर्णय गरेको हो,” सञ्चारमन्त्री मोनिका मुत्सभाङ्वाले भने । सरकारले सबैलाई खोप लगाउनका लागि अनुरोध गरेको र नलगाउनेलाई अरू पनि धेरै ठाउँमा वञ्चित र निषेध गरिने उनले बताए ।

उनले खोप लगाउनका लागि विभिन्न बसपार्कलगायत देशभरका विभिन्न ठाउँमा व्यवस्था गरिएको जानकारी दिए । खोप नलगाएकाहरूलाई सरकारी निकाय वा भिडभाड हुने सार्वजनिक स्थलमा नजान पनि उनले आग्रह गरे । उनले शैक्षिक संस्थाहरूमा पनि खोप लगाउन उमेर पुगेकाहरूले लगाउनु पर्ने र त्यही अनुसारको सतर्कता अपनाउनु पर्नेमा जोड दिए ।

सरकारी तथ्याङ्कअनुसार जिम्बाबेमा अहिलेसम्म कोरोनाका कारण एक लाख ४१ हजार ६०१ जना सङ्क्रमित भएका छन् । ती मध्ये चार हजार ७१३ जनाको मृत्यु भएको छ भने एक लाख २८ हजार ९६६ जना सङ्क्रमणमुक्त भएका छन् । देशभरका ३८ लाख ८२ हजार २५५ जनाले कम्तीमा एउटा खोप लगाएका छन् भने २८ लाख ९२ हजार ३६६ जनाले दुवै खोप लगाएका छन् । सिन्ह्वा
मकालु खबर