अब देखि सार्वजनिक स्थानमा प्रधानमन्त्रीको फोटो मोबाइल फोनबाट खिच्न नपाइने

रामेछाप खबर संवाददाता

काठमाडौं, १२ चैत्र ।

प्रधानमन्त्री सहभागी सार्वजनिक कार्यक्रममा मोबाइल फोनबाट फोटो–भिडियो नखिच्न सूचना दिइएको छ । ललितपुरको जावलाखेलस्थित स्टाफ कलेजमा प्रधानमन्त्री केपी शर्मा ओलीले पशुपन्छीजन्य उत्पादनमा मुलुक आत्मनिर्भर भएको घोषणा गर्ने कार्यक्रममा कृषि मन्त्रालयका उपसचिव प्रदीप कुमार भट्टराईले कार्यक्रम शुरू हुनु पूर्व यस्तो जानकारी गराएका हुन् ।

प्रधानमन्त्रीका सुरक्षाकर्मीले प्रोटोकल अनुसार मोवाइल फोनबाट फोटो खिच्न नमिल्ने जानकारी पाएको उनले बताए । बिहान ११ बजेका लागि तय गरिएको कार्यक्रम अझै सुरू भएको छैन ।

स्वास्थ्य सुरक्षा मापदण्ड अपनाउन स्याङ्जा प्रशासनको आग्रह

स्याङ्जा : कोरोना संक्रमण बढ्न सक्ने जनाउँदै जिल्ला प्रशासन कार्यालय स्याङजाले स्वास्थ्य सुरक्षा मापदण्डसहित सतर्कता अपनाउन आग्रह गरेक छ। छिमेकी मुलुक भारतमा कोरोना संक्रमण बढेपछि नेपालमा पनि जोखिम बढ्ने देखिएपछि सजक रहन स्वास्थ्य मन्त्रालयको निर्देशन बमोजिम स्याङजा प्रशासनले सजक रहन आग्रह गरेको हो।

कोभिडविरुद्ध लड्न सबै नागरिकले आवश्यक समन्वय गर्न र स्वास्थ्य मापदण्ड अबलम्बन गर्न प्रशासनको आग्रह छ। प्रशासकीय अधिकृत राजेन्द्र शर्माद्वारा हस्ताक्षरित सूचनामा अति आवश्यक कामबाहेक जिल्लाभित्र भीडभाड हुने किसिमका कार्यक्रम, सभा तथा समारोह संचालन नगर्न आग्रह गरिएको छ ।

विभिन्न ६ बुँदामा उल्लेखित सार्वजनिक सूचनामा पटक पटक हात धुन, सेनिटाइजरको प्रयोग गर्न, हिँडडुल गर्दा अनिवार्य मास्क लगाउन र कम्तीमा २ मीटर सामाजिक दूरी कायम गर्न भनिएको छ।

त्यस्तै, कोभिडको लक्षण देखिएमा तत्कालै तोकिएको स्वास्थ्य संस्थामा गइ कोरोना परीक्षण गराउन र जिल्लाका ११ वटै स्थानीय तहलाई संक्रमणको सम्भावनालाई मध्यनजर गर्दै क्वारेन्टाइन र आइशोलेसन केन्द्र तयारी अवस्थामा राख्न निर्देशन दिएको छ। होटल, पसल व्यापार सञ्चालन गर्दा जनस्वास्थ्य तथा सुरक्षाका मापदण्ड पालना गर्न गराउन सूचनामार्फत आग्रह गरिएको छ ।