४२ वर्षको हुँदा जनयुद्धको नेतृत्व गरेको थिएँ, म त बाँचुञ्जेल लड्ने नै भएँ– प्रचण्ड

रामेछाप खबर संवाददाता

काठमाडौं, ८ चैत्र ।

नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले संविधान कार्यान्वयन गर्न नदिन ठूलो षडयन्त्र भइरहेको दाबी गर्दै त्यसका विरुद्ध आफूले जीवनभर संघर्ष गर्ने बताएका छन् ।

धूलोमैलो टक्टक्याएर आन्दोलनका लागि आफू झनै बलियो बनेको उनको दाबी छ । ५६ औं अन्तर्राष्ट्रिय रंगभेद विरुद्धको दिवसका अवसरमा नेपाल दलित मुक्ति मोर्चाले आइतवार काठमाडौंमा आयोजना गरेको कार्यक्रममा अध्यक्ष प्रचण्डले अन्यायविरुद्ध जीवनभर संघर्ष गर्ने बताएका हुन् ।

‘३६ वर्षको उमेरमा महासचिव बनेको थिएँ, जनयुद्ध गर्दा ४२ वर्षको थिएँ, ५२ वर्षमा शान्ति सम्झौता गरें । अहिले अर्को लडाईं लड्नुपर्ने भएको छ, म बाँचुञ्जेल लड्छु’ प्रचण्डले भने, ‘अन्यायविरुद्ध विद्रोह गर्नुपर्छ भन्ने सिद्धान्तमा विश्वास गर्ने भएकाले म अन्तिम समयसम्म भिडिरहन्छु । जनजाति, दलित लगायत पिछडिएका समुदायको अधिकार खोस्ने षड्यन्त्र ठूलो छ, त्यसको केन्द्रित अभिव्यक्ति संविधान कार्यान्वयन गर्न नदिने हो । जनताको अधिकार खोस्ने निर्णयविरुद्ध म त बाँचुञ्जेल लड्ने नै भएँ ।’

पार्टीमा फर्किनेलाई उचित जिम्मेवारी दिइन्छ : ओली

प्रधानमन्त्रीसमेत रहेका नेकपा एमाले अध्यक्ष केपी शर्मा ओलीले पार्टीमा फर्किनेलाई उचित जिम्मेवारी दिने बताएका छन् । पार्टी संसदीय दलको आजको बैठकमा उनले नेपाल–खनाल समूहबाट मुल पार्टी एमालेमा फर्किन नेता–कार्यकर्तालाई उचित जिम्मेवारी दिने बताएका हुन् ।

उनले पार्टीमा फर्किन चाहनेहरुलाई स्वागत छ भन्दै स्पष्टिकरण सोधेर पार्टीमा फर्काउने र उचित जिम्मेवारी दिने बताएका हुन् । ओलीले बोलाएको संसदीय दलको आजको बैठकमा नेता वामदेव गौतम तथा कृष्णभक्त पोखरेल सहभागी भएका छन् ।

झण्डा र चुनाव चिन्ह कब्जा गर्ने सपना नदेख्नुहोस्ओ लीले आफू रहुञ्जेल पार्टीको झण्डा र चुनाव चिन्ह कब्जा गर्ने सपना नदेख्न चेतावनी दिएका छन् ।

प्रधानमन्त्रीसमेत रहेका नेकपा एमाले अध्यक्ष ओलीले माधव नेपाल पक्षले गरेको राष्ट्रिय भेलालाई कम्युनिस्ट आन्दोलनको कलंकको संज्ञा पनि दिए ।उनले नेताहरुको नाम नलिई भने, ‘त्यस भेलाका आयोजक अगुवालाई स्पष्टिकरण सोधिन्छ । सच्चिएर आत्मालोचना गरेर आए सोच्न सकिन्छ, नत्र कारबाहीको प्रक्रिया अघि बढ्छ, बढाइन्छ ।’

आफूले निर्देशन दिँदादिँदै पनि छुट्टै भेला बोलाएको भन्दै उनले आक्रोश पनि व्यक्त गरे । ‘नेतृत्वलाई खुइल्याउने र सरकारको बदनाम गराउने नियतले भएको उक्त भेला नगर्न मैले र महसचिवले निर्देशन दिँदादिदै पनि कथित भेला गरिएको छ,’ उनले भने, ‘कम्युनिस्ट आन्दोलनको कलंकको रुपमा चिनिएको भेलाको आयोजक अगुवालाई कारबाही गरिनेछ ।’

उनले एक फरक प्रसंगमा प्रचण्डलाई माधव नेपालसँग तुलना पनि गरे । नेपालभन्दा दाहाल प्रष्ट भएको उनले संकेत गरे । ‘बरु प्रचण्ड ह्वाङ्गै, छ्याङ्गै छन् । बुटवल र सिन्धुलीबाट सबै कुरा छ्याङै पारे,’ उनले भने ।

आफूलाई पार्टी सदस्यबाट हटाएको विगतलाई स्मरण गराउँदै उनले भने, ‘मलाई त अध्यक्ष र पार्टी सदस्यबाट हटाए, धन्न मेरो नागरिकता खोसेनन् । उनीहरुले पार्टी र झण्डा चुनाव चिन्ह कब्जा गर्न खोजेका थिए । केपी ओली भएसम्म त्यो सपना नदेखे हुन्छ ।’

आफ्नो राजीनामा माग्नेहरुलाई अविश्वासको प्रस्ताव ल्याउन चुनौति दिँदै ओलीले भने, ‘राजीनामा माग्ने होइन, अविश्वासको प्रस्ताव ल्याउन् । तर सरकारविरुद्ध अविश्वास प्रस्ताव आउने स्थिति देखिएको छैन ।