ढोकामा आइसकेको प्रधानमन्त्री पदलाई देउवाले किन झ्यालबाट चिहाइरहेका छन् ?

रामेछाप खबर संवाददाता

काठमाडौं, २ चैत्र ।

पार्टीबाट प्रधानमन्त्री बन्ने सर्वसम्मत वातावरण बन्दा पनि काँग्रेस सभापति शेरबहादुर देउवा सरकार बनाउने खेलमा लागिसकेका छैनन् । ‘सरकार बनाउन र गिराउन’ संसद्को गणितलाई आफूअनुकूल पार्न पोख्त नेपालको छवि बनाएका देउवा यसपटक नहतारिनुमा अनेक अड्कलबाजी हुन थालेका छन् ।

अहिलेको राजनीतिक परिदृश्यमा प्रधानमन्त्री बन्ने सम्भावना भएका नेतामा देउवा नै अग्रपंक्तिमा छन् । माओवादी केन्द्रका साथै जनता समाजवादी पार्टी (जसपा) का अध्यक्ष उपेन्द्र यादव र अर्का अध्यक्ष बाबुराम भट्टराई समूहले धेरै अघिदेखि नै देउवालाई प्रधानमन्त्रीमा प्रस्ताव गरिसकेका हुन् । जसपाका अर्का अध्यक्ष महन्थ ठाकुर र वरिष्ठ नेता राजेन्द्र महतो भने प्रधानमन्त्री केपी शर्मा ओलीसँग निकट देखिएका छन् । तर, देउवा अघि बढ्दा पार्टीबाट विद्रोह गरेर ओलीसँगै गठबन्धन गर्ने सम्भावना कम हुने जसपाका नेताहरुको दाबी छ ।

देउवाले ढोकामा आइसकेको प्रधानमन्त्री पदलाई किन झ्यालबाट चिहाइरहेका छन् त ? यी सबै परिदृश्यका पछि देउवाको चाहना मुलुकलाई मध्यावधि निर्वाचनतिरै धकेल्न सकिन्छ कि भन्नेमा केन्द्रीत रहेको उनीनिकट नेताहरु बताउँछन् । ‘सभापतिजीमा कम्युनिस्टहरु फुटेकै बेला निर्वाचनमा गए पार्टीलाई फाइदा हुन्छ भन्ने सोचाइ होला । केही बाह्य कारण पनि होलान्,’ काँग्रेसका एक नेताले भने ।

आजको कान्तिपुर दैनिकमा समाचार छ ।

उत्तर कोरियाद्वारा अमेरिकाको सम्पर्क प्रयासको वेवास्ता

अमेरिकी राष्ट्रपति जोय बाइडेनको नेतृत्वमा रहेको सरकारले गत फ्रेब्ुअरी देखि नै आफुले उत्तर कोरियाली सरकारसंग सम्पर्क राख्ने प्रयास गरिरहेको तर अझै सम्म पनि कुनै पनि प्रतिक्रिया प्राप्त भइ नसकेको जनाएको छ । अमेरिकी सरकारी अधिकारीहरुले आपसी तनाव बढ्न नदिन थुप्रै फरक फरक बाटोबाट प्योंगयांग सम्म पुग्ने प्रयासहरु गरिएको जानकारी दिएका छन् ।

उत्तर कोरियाको परमाणविक हातहतियार विकास कार्यक्रम र व्यालेस्टिक क्षेप्यास्त्र कार्यक्रमको कारण लामो समय देखि अमेरिका र उत्तर कोरियाबिच मतभेद रहँदै आएको छ । बाइडेन अघिका अमेरिकी राष्ट्रपति डोनाल्ड ट्रम्पले उत्तर कोरियाली सर्वोच्च नेता किम जोंग उनसंग गरेका तीनवटा वार्ताबाट थोरै मात्र उपलबिध हासिल हुन सकेको थियो । ति वार्ताले उत्तर कोरियालाई परमाणविक हातहतियार कार्यक्रम त्याग्न लगाउन सकेको छैन । यो अमेरिका र अन्य पश्चिमी शक्ति राष्ट्रहरुको प्रमुख माग रहँदै आएको छ ।

उत्तर कोरियाली सरकारी संचार माध्यमले समेत अझै सम्म जोय बाइडेनलाई अमेरिकाको राष्ट्रपतिको औपचारिक मान्यता दिइसकेको छैन ।
अमेरिकाले प्याेंगयांगसंग संवाद गर्ने प्रयास गरेकाहरु मध्ये संयुक्त राष्ट्र संघ स्थित उत्तर कोरियाली मिसन अर्थात ‘ न्युयोर्क च्यानल ’ पनि एक हो । त्यसैगरी एक जना वरिष्ठा अमेरिकी सरकारी अधिकारीले डोनाल्ड ट्रम्पको राष्ट्रपतिकालको उत्तरार्ध देखि अर्थात १२ महिना भन्दा लामो समय देखि उत्तर कोरियासंग सम्पर्क राख्ने धेरै प्रयास हरु हुँदै आएको तर सफल हुन नसकेको अन्तर्राष्ट्रिय समाचार निकाय रोयटर्सलाई बताएका छन् ।
बाइडेनले उत्तर कोरियासंगको नीति माथि पुनरावलोकन भइसकेको घोषणा गरिसकेका छन् । आगामी अप्रिलमा सो नीति सार्वजनिक हुने अपेक्षा गरिएको छ । बाइडेनले किम लाई ठगको संज्ञा दिएका छन् ।

साथै उनले उत्तर कोरिया माथि लगाइएको अमेरिकी र संयुक्त राष्ट्र संघको कडा नाकावन्दि हटाइनु अघि उत्तर कोरियाले परमाणविक हतियार कार्यक्रम पूर्ण रुपमा त्याग्नुपर्ने विचार पनि व्यक्त गरेका छन् । तर किम भने निरन्तर रुपमा सैन्य शक्रि विस्तार , लामो दूरीका थप शक्रिशाली क्षेप्यास्त्र विकास , जासुसी भूउपग्ह निर्माण र परमाणविक शक्तिबाट चल्ने पनडुब्बी विकास कार्यमा लागिपरेका छन् । साथै किमले अमेरिकालाई शत्रुतापूर्ण नीतिहरु त्याग्न पनि आब्हान गदैआएका छन् ।