खोरोना खोप लगाएपछि नेपाली चिकित्सकहरुलाई के भयो ?

रामेछाप खबर संवाददाता

काठमाडौं, १८ माघ ।

वरिष्ठ जनस्वास्थ्यकर्मी डा. रवीन्द्र पाण्डेले कोरोना खोप लगाएपछिको अनुभव सामाजिक सञ्जालमा शेयर गरेका छन् ।
डा. पाण्डेका अनुसार खोप लगाएपछि उनीलगायतका स्वास्थ्यकर्मीहरुको अनुभव सामाजिक सञ्जालमा शेयर गरेका हुन् ।

‘हिजो कोरोनाको खोप लगाएको ५ मिनेटपछि अनुहारमा टिमुर खाएजस्तो रमरम भयो,’ उनले भनेका छन्, ‘घरमा आएपछि सामान्य वाकवाकी, रिंगटा, जिउ दुख्ने, जाडो हुने तथा शरीर तातो हुने लक्षण देखियो ।’

उनले रातिदेखि खोप लगाएको हात हल्का दुःखेको र अरु लक्षण हराएको बताएका छन् । ‘मसँगै खोप लगाएका स्वास्थ्यकर्मीहरुलाई ज्वरो आउने, जाडो हुने, टाउको दुख्ने, रिंगटा लाग्ने, शरीर लुलो भएजस्तो हुने लगायत देखिएको थियो,’ उनले भनेका छन्, ‘उहाँहरु आज फ्रेस हुनुहुन्छ । कोरोनाको खोपले एकाध स्वास्थ्यकर्मीलाई बाहेक गम्भीर लक्षण देखिएको छैन ।’

डा. पाण्डेले खोप केन्द्रमा आफ्नो स्वास्थ्य अवस्था राम्रोसँग बताएर मात्र खोप लगाउने हो भने गाह्रो नहुने बताए । ‘आफु स्वस्थ भएको समयमा, खाना तथा पानी प्रशस्त सेवन गरेर एबम उच्च मनोबल सहित खोप केन्द्रमा (आफ्नो पालोमा) जानुहोला,’ उनले सुझाव दिए ।

उनी भन्छन्, ‘हामी सबै नागरिकलाई पुग्नेगरि खोप ल्याउन सरकारले कुटनैतिक तथा व्यवस्थापक स्थापकीय कौशलता प्रयोग गरोस् ।’