अनलाइनबाट पुनः श्रम स्वीकृतिको काम यसरि हुन्छ

रामेछाप खबर संवाददाता

काठमाडौं, १९ पुस ।

वैदेशिक रोजगारीमा जाने नेपाली कामदारका लागि वैदेशिक रोजगार विभागले अनलाइन माध्यमबाट पुनः श्रम स्वीकृति दिन थालेको छ । यसअघि श्रम स्वीकृति लिन श्रम ग्राम कार्यालय धाउनुपर्ने बाध्यताबाट सेवाग्राहीलाई मुक्ति दिन भन्दै विभागले शुक्रबारदेखि अनलाइनबाटै पुनः श्रम स्वीकृति दिन थालेको हो ।

विभागको यस्तो नयाँ व्यवस्थासँगै अब वैदेशिक रोजगारीका लागि विभिन्न मुलुकमा पुगेर घर बिदामा आएका नेपाली कामदारले पुनः श्रम स्वीकृति लिन श्रम कार्यालयमा पुगेर घन्टौंसम्म लाइनमा बस्नुपर्ने यसअघि भोग्दै आएको बाध्यात्मक अवस्थाको अन्त्य भएको छ । अनलाइन सेवा सञ्चालनमा आएको पहिलो दिन शुक्रबार पुनः श्रम स्वीकृति लिनेको चाप त्यति नदेखिए पनि अब विस्तारै चाप बढ्दै जाने विभागको अपेक्षा छ ।

विभागका अनुसार अनलाइनबाट पुनः श्रम स्वीकृति लिन चाहने व्यक्तिले वैदेशिक रोजगारीमा जान आवश्यक म्यादी जीवन बिमा र वैदेशिक रोजगार प्रवद्र्धन कल्याणकारी कोषमा जम्मा गर्नुपर्ने रकम भुक्तानी गरी आफू बसेकै स्थानबाट सहज रूपमा अनलाइनमार्फत आवेदन दिन सक्नेछन् ।

एकपटक विभागबाट आईडी लिएका, फिंगर प्रिन्ट गराएका, बायोमेट्रिक लिइसकेका व्यक्तिलाई पुरानै विवरणको आधारमा पुनः श्रम स्वीकृति दिने व्यवस्था मिलाइएपछि अनलाइनबाटै आवेदन दिएर निःशुल्क सेवा लिन सकिने व्यवस्था गरिएको छ

अनलाइनबाट पुनः श्रम स्वीकृति लिने प्रक्रियामा जानुअघि कामदारले आफ्नो राहदानी, पासपोर्ट साइजको तस्बिर, आफू जाने मुलुकबाट आएको कामदार भिसा एवं पुरानो भिसा र राहदानीलगायत विभिन्न ७ किसिमका कागजात सकंलन गरी सम्पूर्ण विवरण स्क्यान गरी वैदेशिक रोजगारीमा जाने व्यक्ति स्वयंम आफंैले प्रयोग गर्ने इमेल ठेगाना र मोबाइल नम्बर राखेर आवेदन दिनुपर्नेहुन्छ । वैदेशिक रोजगारीमा जाने व्यक्तिले प्रयोग गर्ने इमेल ठेगाना र मोबाइल नम्बर प्रयोग गर्दा विदेशमा रहुन्जेल आवश्यक सूचना प्राप्त हुने विभागले जनाएको छ ।

वैदेशिक रोजगार विभागका महानिर्देशक कुमार दाहालले अहिले पुनः श्रम स्वीकृतिको काम मात्रै अनलाइनबाट थालनी गरेको विभागले आगामी १ माघदेखि भने सबै प्रकारका श्रम स्वीकृतिको काम अनलाइनबाटै हुने जानकारी दिए । जसका लागि विभागले आन्तरिक गृहकार्य जारी राखेको उनको भनाइ छ । उनले अनलाइन सेवा सञ्चालनमा आएसँगै पुनः श्रम स्वीकृति लिन विभागको कार्यालय धाउनुपर्ने यसअघिका बाध्यात्मक अवस्था अन्त्य हुने अपेक्षा गरिएको बताए ।

विभागका महानिर्देशक दाहालले एकपटक विभागबाट आईडी लिएका, फिंगर प्रिन्ट गराएका, बायोमेट्रिक लिइसकेका व्यक्तिलाई पुरानै विवरणको आधारमा पुनः श्रम स्वीकृति दिने व्यवस्था मिलाइएपछि अनलाइनबाटै आवेदन दिएर निःशुल्क सेवा लिन सकिने व्यवस्था गरिएको जानकारी गराए ।

यस्तो छ अनलाइन सेवामा चाहिने कागजात

– पासपोर्ट साइजको फोटोको स्क्यान कपी

– राहदानीको पेज २, ३ र ३१ को स्क्यान कपी
– सम्बन्धित देशबाट आएको भिसाको स्क्यान कपी
– पुरानो भिसा भए सो राहदानी र हालको भिसा दुवैको स्क्यान कपी ।
– अध्यागमन कार्यालयले राहदानीमा लगाएको डिपार्चर र अराइभल स्टाम्प भएको राहदानीको पानाको स्क्यान कपी
– यसअघि श्रम स्वीकृति लिएको भन्दा फरक रोजगारदाताकोमा काम गर्न जाने कामदारका लागि रोजगारदाताले उपलब्ध गराएको जब अफर लेटर वा सम्झौता पत्रको स्क्यान कपी
– सम्बन्धित रोजगारदाता मुलकस्थित नेपाली दूतावास वा कूटनीतिक नियोगको प्रमाणीकरणपत्र आवश्यक पर्ने भनी तोकिएको अवस्थामा त्यसको स्क्यान कपी र अन्य कुनै प्रमाण कागजात भए ती सबै स्क्यान गरेर पठाउनुपर्नेहुन्छ ।

उनले नयाँ श्रम स्वीकृतिका लागि भने विभागले सम्बन्धित मेनपावर, मेडिकल र ओरिन्टेसन कक्षा लिएको संस्थाबाट बायोमेट्रिक विवरण तानेर अनलाइनबाट श्रम स्वीकृति दिने व्यवस्था गर्ने विषयमा छलफल गरिरहेको समेत जानकारी दिए । अनलाइनबाट पुनः श्रम स्वीकृति लिने व्यवस्था सञ्चालनमा आएसँगै अब विदेशमा रहेका नेपाली कामदारलाई पुनः श्रम स्वीकृति लिन नेपाल आउनुपर्ने बाध्यता नहुने उनको भनाइ छ ।

तपाईको समाचार, लेख /रचना वा सुझाव र प्रतिक्रिया भएमा [email protected] मा पठाउनुहोला ।