बडा दशैं शुरु भए लगत्तै बढ्यो प्याजको मूल्य

रामेछाप खबर संवाददाता

काठमाडौँ, ५ कात्तिक ।

काठमाडौं – सुकेको प्याजको मूल्य फेरी पनि बढेको छ ।बडा दशैं शुरु भए लगत्तै नेपाली बजारमा प्याजको मूल्य बढेको हो । ल्य सोमबारको तुलनामा आज प्याजको मुलय बढेर आएको हो ।प्याजको मूल्य प्रतिकिलो १४ रुपैयाँले बढेको हो ।

मंगलबार प्याजको थोक मूल्य अधिकतम १ सय ३५ रुपैयाँ र न्यूनतम १ सय ३० रुपैयाँ तोकिएको छ भने औसत मूल्य १ सय ३२ रुपैयाँ तोकिएको छ ।

प्याजको मूल्य यसअघि सोमबार किलोको एक सय १८ रुपैया रहेको थियो ।भारतले प्याजमा प्रतिबन्ध लगाएपछि बढेको प्याजको मूल्य पुन बढेको हो । चाडबाड नजिकिएसँगै बजारमा प्याजको मूल्य बढ्दै गइरहेको हो ।

दशैँमा पनि विदेशिने बढ्दै

काठमाडौं, कात्तिक ५ । स्वदेश र गन्तव्य दुवैमा एकातिर कोरोनाको त्रास अर्को मुखैमा आएको दशैँको रौनक । यस्तो परिस्थितिमा पनि विदेश जाने लर्को बढ्दै छ ।
लामो समयसम्म घरमा बेरोजगार बस्दा जीवन धान्नै धौधौ हुन थालेपछि धेरै नेपाली युवा दशैँको मुखैमा वैदेशिक रोजगारीमा जाँदै छन् । कोरोनाको डर र दशैँ मान्ने रहर हुँदाहुँदै पनि धेरै युवालाई विदेश जानुपर्ने बाध्यता परेको हो ।

यस्तैमध्येका छन पर्वत कुस्मा नगरपालिकाका राजुप्रसाद सुवेदी । गत फागुनमा साउदी अरबबाट तीन महिनाको घर बिदामा आएका सुवेदी गत जेठमै जानुपर्ने हो तर कोरोनाका कारण उडान बन्द भएर रोकिए र उडान खुल्यो, बल्ल जान थालेका छन् ।

१६ वर्षदेखि साउदीमा आउने–जाने गरिरहेका उनले भने, “कोरोनाको बढ्दो त्रास र मुखैमा आएको दशैँ नमानी जाने रहर त कहाँ थियो र ? भर्खर घर बनाउँदै छु, ऋण लागेको छ, नगएर के गर्नु?”

उनीजस्तै कुवेत जान हिडेका चितवनका रामबहादुर केसीले विदेशको रोजगारी गुम्ने चिन्ताले मुखैमा आएको दशैँ छोडेर हिँडेको बताउँन्छन् । भिसाको म्याद पनि सकिँदै छ । कम्पनीबाट पनि अहिल्यै आउन भनेको छ, त्यसैले जान लागेको, निराश हुँदै उनले भने, “हामीले विदेशमा सिकेको सीप लगाउने कुनै ठाउँ छैन यहाँ ।

जहाँ पनि आफूले चिनेको मान्छे भए मात्र काम बन्छ । त्यसैले यहाँ केही गर्न सकिन्नजस्तो लाग्यो । ”रोजगारीको खोजीमा मलेसिया र खाडी मुलुकमा जानु धेरैको बाध्यता हो ।

गाउँमै, देशमै बस्दा पुग्ने भए किन परदेशिन पथ्र्यो होला र ? त्यसैमाथि एकातर्फ कोरोनाको त्रास अर्कोतर्फ मुखैमा आएको दशैँ छोडेर ।

गन्तव्य देशमा कोरोना जोखिम बढेपछि सरकारले गएको फागुन अन्तिमदेखि श्रम स्वीकृति रोकेको थियो । गोरखापत्र दैनिकबाट

तपाईको समाचार, लेख /रचना वा सुझाव र प्रतिक्रिया भएमा [email protected] मा पठाउनुहोला ।