सुनचाँदिको भाउमा भारी गिरावट: तोलाको कती ?

रामेछाप खबर संवाददाता

काठमाडौँ, ३ कार्तिक ।

नेपाली बजारमा सोमबार सुनको मूल्य तोलमा ९४ हजार ७०० रुपैयाँमा कारोबार भएको छ । नेपाल सुनचाँदी व्यवसायी महासंघका अनुसार आइतबार तोलामा ९४ हजार ९०० रुपैयाँमा कारोबार भएको छापावाल सुनको मूल्य सोमबार २०० रुपैयाँले घटेर तोलामा ९४ हजार ७०० रुपैयाँमा कारोबार भएको हो ।

यस्तै तेजावी सुन तोलामा ९४ हजार २०० रुपैयाँमा कारोबार भएको छ ।
यसैबीच सोमबार चाँदीको मूल्य भने स्थिर रहेको छ । आइतबार तोलामा १२०० रुपैयाँमा कारोबार भएको चाँदीको मूल्य सोमबार पनि सोही मूल्यमा कारोबार भएकोहो ।

दसैँ खर्च जोहो गर्न लागेपछि नेप्से घट्यो

नेप्से परिसूचक आइतबार ५ दशमलव ६६ अंकले घटेर १ हजार ५ सय ५६ बिन्दुमा आएको छ । दसैँका कारण लगानीकर्ता सेयर बेचेर खर्च जोहो गर्नतर्फ समेत लागेपछि बजारमा बिक्री चाप बढेको हो ।

यस दिन बजार बियरिस रहेको नेप्सेको मैनबत्ती चित्रले देखाउँछ । आइतबारको सुरु, उच्च, न्यून र अन्तिम बिन्दुका आधारमा कालो मैनबत्ती बनेको छ । यसले बजार थप घट्ने संकेत पनि गर्छ । त्यस्तै, नेप्सेको ७ दिने मुभिङ एभरेज रेखाले २१ दिने मुभिङ एभरेज रेखालाई समेत भेटेको छ । यसअघिसम्म माथि रहेको ७ दिने मुभिङ एभरेज रेखा २१ दिनभन्दा तल आएमा बजार थप घट्नेछ ।

आइतबार कारोबार रकमसमेत केही घटेको छ । यस दिन १ अर्ब २६ करोड रुपैयाँमा १ सय ८७ कम्पनीका धितोपत्र तथा ऋणपत्रको कारोबार भएको छ । कारोबारमा आएकामध्ये १ सय १० कम्पनीको मूल्य घटेको र ३७ कम्पनीको मूल्य बढेको छ ।

व्यापारमूलक र निर्जीवन बिमाबाहेक सबै समूहगत परिसूचक घटेका छन् । जनरल, प्रुडेन्सियल, शिखरलगायतका निर्जीवन बिमा कम्पनीको मूल्य बढेको हो । नेपाल ल्युब आयलको करिब ५ प्रतिशतले मूल्य बढेपछि व्यापारमूलक समूहमा वृद्धि भएको हो ।

हिमालयनबाट बाहिरियो ज्योति समूह
हिमालयन बैंकबाट ज्योति समूह बाहिरिएको छ । आइतबार हिमालयन बैंकको ८ लाख १५ हजार कित्ता सेयर ३ सय रुपैयाँमा कारोबार भएको हो । समूहले स्याकार कम्पनीको नामबाट बैंकमा लगानी गरेको थियो । बैंकमा ०.९९ प्रतिशत सेयर स्वामित्व रहेको बैंकको ०७५/७६ को वार्षिक वित्तीय विवरणले देखाउँछ । स्याकार कम्पनीको नाममा रहेको सबै सेयर बिक्री भएको बुझिएको छ । पारिवारिक लेनदेन मिलाउन सेयर किनबेच भएको बुझिन्छ ।

२५ कम्पनीको कारोबार रोक्का
आइतबार २५ कम्पनीका लगानीकर्ताले सेयर किनबेच गर्न पाएनन् । कम्पनीहरूले वार्षिक नवीकरण शुल्क नतिरेका कारण कारोबार रोक्का गरिएको नेप्सेले उल्लेख गरेको छ । यसमध्ये अधिकांश कम्पनी बजारमा धेरै समयदेखि कारोबारमा छैनन् । केही समयअघि कारोबार भएको रघु जुटमिल केही महिनाअघि सञ्चालन बन्द भएको थियो । समस्याग्रस्त सूचीमा रहिरहेका वित्त कम्पनीहरूसमेत रोक्काको यो सूचीमा छन् । तर, नियमित कारोबार हुने जोशी हाइड्रोपावर, हिमाल दोलखा हाइड्रो, नेपाल हाइड्रो र हिमालयन डिस्टिलरीको समेत कारोबार रोक्का भएको छ ।